დემოკრატიის კვლევის ინსტიტუტი გმობს ბათუმის პორტში კრუიზ  „ASTORIA GRANDE“-ს შემოსვლასთან დაკავშირებით მიმდინარე მშვიდობიანი აქციის მონაწილეების უკანონო დაკავებებს და მოუწოდებს სამართალდამცავ ორგანოებს, იმოქმედონ საქართველოს კონსტიტუციისა და კანონმდებლობის ფარგლებში.

საკრუიზო გემი „ASTORIA GRANDE“ მორიგი ტურის ფარგლებში სოჭის პორტიდან 30 ივლისს დაიძრა. გემი ბათუმის ნავსადგურში 31 ივლისს, დილის 5 საათისთვის შემოვიდა. 30 ივლისს პოლიციამ გადაკეტა ყველა ის მონაკვეთი ბათუმში, საიდანაც ნავსადგურთან მისვლა შეიძლებოდა. საჯაროდ ცნობილი იყო, რომ სტუდენტები, აქტივისტები და ოპოზიციური პარტიის წარმომადგენლები გეგმავდნენ  აქციას რუსეთიდან მომავალი საკრუიზო გემის ბათუმში შემოსვლის გასაპროტესტებლად.

მედია საშუალებების მიერ გავრცელებული ინფორმაციით, სამართალდამცავებმა დილის 4 საათისთვის  ათამდე ოპოზიციონერი დააკავეს. დილის 10 საათამდე, დამატებით დააკავეს სამი აქტივისტი.

დემოკრატიის კვლევის ინსტიტუტის ინფორმაციით, დაკავებებს პირადად ხელმძღვანელობს საქართველოს შინაგან საქმეთა სამინისტროს აჭარის ა/რ პოლიციის დეპარტამენტის დირექტორი გრიგოლ ბესელია, რომელსაც სოციალურ ქსელში გავრცელებული ფოტოს მეშვეობით, პირადად ადანაშაულებენ ძალადობაში. აქციის ერთ-ერთი მონაწილის განცხადებით, მან აქციაზე მყოფ გოგოს სახეში გაარტყა. წარსულში გრიგოლ ბესელიას მოქალაქეები იარაღის ჩადებაშიც ადანაშაულებდნენ. აქტივისტების დაკავებაში ასევე პირადად მონაწილეობს საქართველოს შინაგან საქმეთა სამინისტროს საპატრულო პოლიციის დეპარტამენტის აჭარის მთავარი სამმართველოს უფროსი დავით მაღრაძე. დავით მაღრაძე  და გრიგოლ ბესელია წარსულშიც არაერთხელ გამოირჩეოდნენ ანტირუსული აქციების დროს სავარაუდო უკანონო დაკავებების ორგანიზებასა და პირადად  განხორციელებაში.

საქართველოს კონსტიტუციის 21-ე მუხლისა და „შეკრებებისა და მანიფესტაციების შესახებ” საქართველოს კანონის მე-2 მუხლის მიზნებისთვის, კონსტიტუციით აღიარებული შეკრების უფლების განხორციელებისას, როგორც ჭერქვეშ, ისე გარეთ, შეკრება წინასწარი ნებართვის გარეშე არის შესაძლებელი. ადმინისტრაციული სამართალდარღვევათა კოდექსის 245-ე მუხლის მიხედვით, დამკავებელი სამართალდამცავი ვალდებულია, დაკავებულს დაკავებისთანავე მისთვის გასაგები ფორმით განუმარტოს: მის მიერ ჩადენილი ადმინისტრაციული სამართალდარღვევა და დაკავების საფუძველი, უფლება ადვოკატზე, მისი სურვილის შემთხვევაში მისი დაკავების ფაქტი და ადგილსამყოფელი ეცნობოს მის მიერ დასახელებულ ახლობელს.

მშვიდობიანი შეკრების მონაწილეთა დაკავებისას, საგანგაშოა არა მხოლოდ სამართალდამცავების მიერ კანონმდებლობით დადგენილი ვალდებულებების შეუსრულებლობა, არამედ მათი მხრიდან გამოყენებული დაუსაბუთებელი, უკანონო და არაპროპორციული ძალადობა. DRI მიიჩნევს, რომ პოლიტიზებული და რეპრესიული უკანონო დაკავებები სახელმწიფოს კონსტიტუციურ წეს-წყობილებას საფუძველს აცლის.

დემოკრატიის კვლევის ინსტიტუტი მოუწოდებს: