2022 წლის 14 დეკემბერს სპეციალურმა პენიტენციურმა სამსახურმა  მიხეილ სააკაშვილის პერსონალური მონაცემების შემცველი ვიდეო მასალა გაასაჯაროვა. გასაჯაროებული კადრები სააკაშვილის საავადმყოფოში ყოფნის სხვადასხვა პერიოდს  ასახავს (ზოგ შემთხვევაში, თარიღი მითითებულია, ზოგ შემთხვევაში - არა), სადაც აშკარად ჩანს პატიმრის დაზიანებული ფიზიკური ჯანმრთელობა და ფსიქოლოგიური მდგომარეობა.

დემოკრატიის კვლევის ინსტიტუტი შენიშნავს, რომ ადამიანის ჯანმრთელობის შესახებ ინფორმაციის განსაკუთრებული კატეგორიის პერსონალურ მონაცემად მიჩნევის საფუძველი სწორედ იმაში მდგომარეობს, რომ ამ კატეგორიის ინფორმაციის გასაჯაროება ღირსების შემლახავი და დამამცირებელია. შესაბამისად, სახელმწიფო პენიტენციური სამსახურის მიერ კადრების გასაჯაროების საბაბად მაღალი საზოგადოებრივი ინტერესის დასახელება ვერ იქნება ლეგიტიმური საფუძველი სააკაშვილის პერსონალური ინფორმაციის იმ მასშტაბით გავრცელების, რისი რეალური შედეგიც  მისი პიროვნული ღირსების შელახვაა.

გასათვალისწინებელია ისიც, რომ საქართველოს ხელისუფლების წარმომადგენლებმა წინასწარ დააანონსეს კადრების გავრცელება, ასევე ღიად განაცხადეს, რომ პატიმრის პერსონალური მონაცემების გასაჯაროება მოტივირებული იყო პოლიტიკური მიზნებით, „ქართული ოცნების“ პარტიული ამოცანების შესასრულებლად.

სახელმწიფოს უმაღლესი თანამდებობის პირები  ცდილობენ საზოგადოებრივი განწყობებით მანიპულაციას, უწოდებენ რა მიხეილ სააკაშვილის ჯანმრთელობის მდგომარეობას „სიმულაციას“, „ტყუილს“. იმის გათვალისწინებით, რომ სახელმწიფო პენიტენციურმა სამსახურმა სასამართლოს ერთთვიანი ვადა სთხოვა მიხეილ სააკაშვილის შესახებ არსებული გამოკვლევების და სამედიცინო დასკვნების გასაცნობად, გაუგებარია, რაზე დაყრდნობით აფასებენ შესაბამისი სამედიცინო კვალიფიკაციის არმქონე პოლიტიკოსები პატიმრის ჯანმრთელობის მდგომარეობას. იმ ვითარებაში, როდესაც  შესაბამისი სახელმწიფო უწყება, მისივე აღიარებით,  არ ფლობს სააკაშვილის ჯანმრთელობის მდგომარეობის შესახებ სრულ და დეტალურ ინფორმაციას, მაგრამ, ამავდროულად,  უმაღლესი თანამდებობის პირების მიერ სააკაშვილის ჯანმრთელობის მდგომარეობის შესახებ შეფასებითი განცხადებები კეთდება, აშკარაა, რომ ეს განცხადებები სპეკულაციური, სუბიექტური და პოლიტიკურად მოტივირებულია.

პერსონალური მონაცემების შემცველი აუდიო და ვიდეო მასალის გასაჯაროება საქართველოში წლების განმავლობაში ჩამოყალიბდა პოლიტიკური ანგარიშსწორების იარაღად. საგანგაშოა, რომ საქართველოს ხელისუფლება ასეთი დანაშაულების  გამოძიების ნაცვლად, უგულებელყოფს ყველაზე მნიშვნელოვანს - ადამიანის ღირსების პატივისცემას და არღვევს ადამიანის პირადი ცხოვრების ხელშეუხებლობის უფლებას.

დემოკრატიის კვლევის ინსტიტუტი მოუწოდებს: