DRI ეხმაურება თბილისის სააპელაციო სასამართლოს მოსამართლის მაია თეთრაულის მიერ მიღებულ განაჩენს 2021 წლის 5 ივლისის ძალადობაში ბრალდებულ პირებთან დაკავშირებით. 2023 წლის 16 იანვრის განაჩენით, ლექსო ლაშქარავასა და მირანდა ბაღათურიას ეპიზოდში მსჯავრდებულებს სასჯელი შეუმცირდათ და ორგანიზებულ ჯგუფურ დანაშაულში მონაწილეობის ნაწილში გამართლდნენ.

2021 წლის 5 ივლისის მასობრივი ძალადობის საქმეებში ორგანიზებული დანაშაულის არსებობას თბილისის საქალაქო სასამართლოში მტკიცებულებების გამოკვლევის ეტაპზე არაერთი მტკიცებულება და სასამართლოს წინაშე დაკითხული მოწმე ადასტურებდა. როგორც პირველ, ისე მეორე ინსტანციის სასამართლოებში პროკურატურის მიერ შესაბამისი მტკიცებულებების წარმოუდგენლობამ სასამართლოს შესაძლებლობა მისცა ბრალდებულებისთვის წაყენებული ბრალი მძიმე მუხლებიდან მსუბუქ მუხლებზე გადაეკვალიფიცირებინა. ეს შესაძლებლობა მოსამართლე თეთრაულმა სრულად გამოიყენა.

ორგანიზებული ჯგუფური დანაშაულის ჯგუფური ძალადობის მუხლზე გადაკვალიფიცირებამ მსჯავრდებულებისთვის შეფარდებული სასჯელის შემცირება გამოიწვია. ლექსო ლაშქარავას და მირანდა ბაღათურიას მიმართ ძალადობის საქმეზე  მსჯავრდებულ ექვსივე პირს პირველი ინსტანციის მიერ შეფარდებული სასჯელი 4 წლამდე შეუმცირდათ. საგანგაშოა, რომ მსჯავრდებულების ორგანიზებულ დანაშაულში გამართლებამ 5 ივლისის ძალადობის ორგანიზატორების არსებობის გამორიცხვისთვის  ნიადაგი შექმნა.

თბილისის სააპელაციო სასამართლოს მოსამართლემ ცოტნე ჩიხლაძის ბრალი ძალაში დატოვა. ბრალდების მხარეს დაზარალებული ილია თვალიაშვილის სამედიცინო ექსპერტიზის დასკვნა არც თბილისის სააპელაციო  სასამართლოსთვის წარუდგენია. თავდაპირველად წარდგენილი ბრალის დადგენის შემთხვევაში, ცოტნე ჩიხლაძის მიმართ სასჯელი 7-დან 10 წლამდე განისაზღვრებოდა.^[1]

DRI მიიჩნევს, რომ თბილისის სააპელაციო სასამართლოს მოსამართლე მაია თეთრაულის მიერ მიღებული განაჩენი წაახალისებს სიძულვილით მოტივირებული დანაშაულების ჩადენას.

^[1]დამატებითი ინფორმაციისთვის იხილეთ DRI-ს მიერ მომზადებული “2021 წლის 5 ივლისის ძალადობრივი დარბევის საქმეების სასამართლო მონიტორინგის ანგარიში”, ხელმისაწვდომია - https://bit.ly/3iHJ6bY