დემოკრატიის კვლევის ინსტიტუტი საზოგადოებას პერიოდულად აწვდის ინფორმაციას აფხაზეთში სამხედრო საზღვაო ფლოტის განთავსებასთან დაკავშირებით. ოკუპირებულ აფხაზეთში, სოფელ ფიჩორთან, ანაკლიიდან ოთხ კილომეტრში, მასშტაბური მოსამზადებელი სამუშაოები საზღვაო ბაზის ასაშენებლად 2023 წლის ოქტომბრიდან დაიწყო და აქტიურად გრძელდება. DRI-ის ინფორმაციით, ბაზის ტერიტორიაზე 10 და 11 იანვარს გაიმართა წვრთნები, სადაც იმიტირებული იყო პორტზე სარაკეტო და დამრტყმელი დრონებით მასობრივი იერიშების მოგერიება. რუსულ ღია წყაროებში აქტიურად ვრცელდება ინფორმაცია, რომ ზემოაღნიშნული ბაზის მშენებლობა შესაძლოა 2024 წელს დასრულდეს.

პარალელურად, 2024 წლის 8 იანვრიდან აფხაზეთში, საოკუპაციო ხაზის რამდენიმე მონაკვეთზე პოზიციის გაძლიერების მიზნით, საფორტიფიკაციო[1] სამუშაოები დაიწყო. თავდაცვითი პოზიციების აშენება სიღრმეშიც მიმდინარეობს - ოჩამჩირის, ტყვარჩელის და გულრიფშის რაიონებში ხდება ეშელონირებული თავდაცვითი პოზიციების მომზადება. პროცესების მმართველ რგოლში რუსეთის გენშტაბის ოფიცრები არიან. ტექნიკურ სამუშაოებს კი, ძირითადად, აფხაზი ჯარისკაცები ასრულებენ.

დემოკრატიის კვლევის ინსტიტუტის შეფასებით, რუსეთის ფედერაცია შესაძლოა აქტიურად ამზადებდეს აფხაზეთის საზღვაო აკვატორიის ტერიტორიას უკრაინის წინააღმდეგ ომში გამოსაყენებლად.

 

[1] ნაგებობა, რომელიც გათვალისწინებულია იარაღის, სამხედრო ტექნიკის, ჯარის, სამართავი პუნქტებისა და სხვათა შესანიღბად და ბრძოლაში უკეთ გამოსაყენებლად. აგრეთვე ჯარის, მოსახლეობისა და ქვეყნის ზურგში განლაგებული ობიექტების დასაცავად მოწინააღმდეგის გამანადგურებელ საშუალებათაგან. საფორტიფიკაციო ნაგებობათა კონსტრუქციებსა და მათი აგებისა და გამოყენების ხერხებს ამუშავებს ფორტიფიკაცია.