GEO   ENG
სიახლეები
„კონსერვატიული მოძრაობა/ალტ-ინფო“ 2024 წლის საპარლამენტო არჩევნებისთვის მზადებას განაგრძობს
28.02.2024
ღიად პრორუსული ულტრამემარჯვენე „კონსერვატიული მოძრაობა/ალტ-ინფოს“ ძალადობრივ პოლიტიკას წლების განმავლობაში „ქართული ოცნების“ ლოიალური დამოკიდებულება ასაზრდოებდა. დემოკრატიის კვლევის ინსტიტუტი ადრეც წერდა „ალტ-ინფოს“ და „ქართული ოცნების“ ლიდერების თანხვედრაში მყოფ ან სულაც იდენტურ ანტილიბერალურ რიტორიკაზე, ხაზგასმით ლოიალურ დამოკიდებულებაზე ერთმანეთის მიმართ, უმოქმედობით წახალისებულ ძალადობაზე ან ხელისუფლების დემონსტრაციულ უარზე - გამოეძიებინა ღიად პრორუსული დაჯგუფების მიერ ორგანიზებული მასობრივი ძალადობის შემთხვევები, რამაც, საბოლოო ჯამში, „ალტ-ინფოს“ ხილვადობა და ლეგიტიმაცია შესძინა.

„კონსერვატიული მოძრაობა/ალტ-ინფოს“ და „ქართული ოცნების“ რიტორიკა ერთმანეთს 2023 წლის ნოემბერში, საქართველოსთვის ევროკავშირის კანდიდატი ქვეყნის სტატუსის მინიჭების შემდეგ დაშორდა, თუმცა ულტრამემარჯვენე დაჯგუფებამ ხელისუფლების ღია კრიტიკა მხოლოდ რადიკალური დაჯგუფების ერთ-ერთი ლიდერის ბექა ვარდოსანიძის რამდენიმესაათიანი დაკითხვის შემდეგ დაიწყო. რიტორიკის მკვეთრი ცვლილების მიუხედავად, ამ ეტაპზე იმის მტკიცება, რომ „ქართულმა ოცნებამ“ „კონსერვატიული მოძრაობა/ალტ-ინფოს“ პირდაპირი თუ ირიბი მხარდაჭერის შეწყვეტის გადაწყვეტილება მიიღო, ნაადრევი, უფრო მეტიც, შეუძლებელია. მითუმეტეს, რომ „კონსერვატიული მოძრაობა/ალტ-ინფო“ 2024 წლის არჩევნებისთვის დაუბრკოლებლად ემზადება. 

რეგიონული შეხვედრები

დემოკრატიის კვლევის ინსტიტუტის დაკვირვებით, „კონსერვატიული მოძრაობა/ალტ-ინფო“ ერთ-ერთი პირველია, ვინც 2024 წლის საპარლამენტო არჩევნებისთვის მზადება ერთი წლით ადრე, 2023 წლის ოქტომბერში რეგიონებში ვიზიტებით დაიწყო. 2023 წლის განმავლობაში „ალტ-ინფომ“ შეხვედრები შვიდ ქალაქში - თელავში, გორში, ქუთაისში, რუსთავში, მცხეთაში, ბათუმსა და ზუგდიდში გამართა. პირველი შეხვედრა თელავში 2023 წლის პირველ ოქტომბერს, თელავის ვაჟა ფშაველას სახელობის სახელმწიფო პროფესიულ დრამატულ თეატრში ჩატარდა. თეატრი საჯარო სამართლის იურიდიული პირია და სახელმწიფო ბიუჯეტიდან ფინანსდება. ამის შესახებ დემოკრატიის კვლევის ინსტიტუტი ადრეც წერდა.

2024 წელს „კონსერვატიული მოძრაობა/ალტ-ინფო“ აქტიურად აგრძელებს რეგიონულ ვიზიტებსა და მოსახლეობასთან შეხვედრებს. 2024 წლის 18 თებერვლიდან 24 თებერვლის ჩათვლით, ექვსი დღის განმავლობაში, დაჯგუფებამ  რეგიონული შეხვედრები კახეთის რვა  რეგიონულ ცენტრში: საგარეჯოში, წნორში, თელავში, ახმეტაში, გურჯაანში, ყვარელში, დედოფლისწყაროში და ლაგოდეხში გამართა.

ყოველდღიური შეხვედრები თბილისის ცენტრალურ ოფისში

22 იანვარს „კონსერვატიული მოძრაობა/ალტ-ინფოს“ ოფიციალურ ფეისბუქგვერდზე გავრცელებული ინფორმაციით, რადიკალურმა დაჯგუფებამ თბილისის ცენტრალურ ოფისში თანამოაზრეებთან ყოველდღიური შეხვედრები დაიწყო. განცხადების მიხედვით, შეხვედრები შაბათ-კვირასაც ჩატარდება.

ოფიციალური ფეისბუქგვერდზე გამოქვეყნებული ფოტო-ვიდეო მასალებზე დაყრდნობით, მიმდინარე წლის 22 იანვრიდან 22 თებერვლამდე, „კონსერვატიულმა მოძრაობამ/ალტ-ინფომ“ ცენტრალურ ოფისში სულ მცირე ექვსი შეხვედრა გამართა. დაჯგუფების ერთ-ერთი ლიდერის შოთა მარტინენკოს განცხადებით, ხალხის მხრიდან დიდი ჩართულობა და ინტერესია: „იმდენად დიდი ინტერესია, რომ ჩვენი მიზანი, რომელიც თბილისში 10.000 კაცის მობილიზებას ისახავდა, გეგმაზე ადრე სრულდება."

რადიკალური დაჯგუფების ფინანსური მდგომარეობა

ერთი შეხედვით, პრორუსულ „კონსერვატიულ მოძრაობა/ალტ-ინფოს“ ფინანსური კრიზისი აქვს. მოძრაობის ოფიციალურ იუთუბ არხზე გამოქვეყნებულ ვიდეოში, ზურაბ მახარაძე ხალხს პარტიისა და ტელევიზიის დახმარებისკენ მოუწოდებს. მიუხედავად ამისა, ჯგუფი აგრძელებს ინტენსიურ რეგიონულ ვიზიტებს და შეხვედრებს თბილისის ცენტრალურ ოფისში. შესაბამისად, რადიკალური და ღიად პრორუსული დაჯგუფების „კონსერვატიული მოძრაობაო/ალტ-ინფოს“ შემოსავალი შესაძლოა ბევრად მაღალი იყოს, ვიდრე ეს ღია წყაროებში ჩანს. 
,,რუსული კანონის“ დასაცავად ხელისუფლება მშვიდობიანი აქციის მონაწილეების წინააღმდეგ ძალადობას აგრძელებს
12 ქართული არასამთავრობო ორგანიზაცია ვაგრძელებთ აპრილი-მაისის პერიოდში "რუსული კანონის" წინააღმდეგ მიმდინარე საპროტესტო აქციების დროს დაკავებული და დაზარალებული პირების უფლებების დაცვას.
16.05.2024
რუსული კანონი უპირობოდ უნდა იქნას გაწვეული
14 მაისს საქართველოს პარლამენტის უმრავლესობის წევრებმა ქართველი ხალხის ეროვნული ინტერესებისა და კონსტიტუციის საწინააღმდეგო რუსული კანონი მესამე მოსმენით მიიღეს.
16.05.2024
DRI: აქციის მონაწილეების მიმართ გამოყენებული ფიზიკური ანგარიშსწორება ვერ ჩაითვლება კანონიერ საპოლიციო ღონისძიებად

DRI ეხმიანება 13 მაისს პარლამენტის მიმდებარე ტერიტორიაზე სპეციალური დანიშნულების რაზმის თანამშრომლების მიერ აქციის მონაწილეების მიმართ ფიზიკური ანგარიშსწორების ფაქტებს, რაც ვერ ჩაითვლება კანონიერ საპოლიციო ღონისძიებებად.

13.05.2024