ვეხმიანებით პრემიერ-მინისტრისა და პარლამენტის თავმჯდომარის განცხადებებს, რომელთა თანახმადაც, ისინი მოსამართლეთა კეთილსინდისიერების შემოწმების მექანიზმის შექმნის საკითხს დახურულად აცხადებენ. სასამართლოს გაჯანსაღების თემა ვერ დაიხურება, რადგან ევროკომისიის ეს მოთხოვნა  საქართველოსთან წევრობაზე მოლაპარაკების გახსნის მნიშვნელოვანი წინაპირობაა, ხოლო საქართველოს მოსახლეობისთვის ევროკავშირში გაწევრიანება უმნიშვნელოვანესი პრიორიტეტი. ევროკომისია მნიშვნელოვნად მიიჩნევს, გადამოწმდეს იუსტიციის უმაღლესი საბჭოს წევრების, უზენაესი სასამართლოს მოსამართლეების, სასამართლოების თავმჯდომარეების და ამ პოზიციებზე დასანიშნი კანდიდატების კეთილსინდისიერების საკითხი.

დღეს სასამართლო სისტემაში წამყვან თანამდებობებზე მყოფი პირების კეთილსინდისიერების და მათ მიერ თანამდებობრივ სარგოსთან შეუთავსებელი ქონების ფლობის შესახებ საფუძვლიანი კითხვები არსებობს. ასევე, საგულისხმოა, რომ რამდენიმე გავლენიანი მოსამართლე სანქცირებულია საქართველოს სტრატეგიული პარტნიორის, ამერიკის შეერთებული შტატების მიერ.

ვფიქრობთ, პირველ რიგში, ხელისუფლების და თავად მოსამართლეების ინტერესი უნდა იყოს საზოგადოებაში არსებული ყველა კითხვის მოხსნა, რომლებიც მართლმსაჯულების პრობლემებსა და მოსამართლეთა კეთილსინდისიერებას ეხება. ჩვენთვის გაურკვეველია, თუ არ არსებობს მოსამართლეთა  კეთილსინდისიერების პრობლემა, რატომ ეწინააღმდეგება პოლიტიკური და სასამართლო ხელისუფლება ამ პროცესს.

წამყვან პოზიციებზე დანიშნული მოსამართლეების და კანდიდატების კეთილსინდისიერების შემოწმების მექანიზმის შექმნის მიზანი მიუკერძოებელი მართლმსაჯულების უზრუნველყოფა და ევროკავშირში გაწევრებაა.  შესაბამისად, ხელისუფლება ამ საკითხის დახურვით, ქართველი ხალხის ნების საწინააღმდეგოდ, ევროინტეგრაციის პროცესს რისკის ქვეშ აყენებს.

სასამართლოს გუშაგი (Court Watch)
დემოკრატიის კვლევის ინსტიტუტი

საერთაშორისო გამჭვირვალობა - საქართველო

დემოკრატიის მცველები

სამოქალაქო საზოგადოების ფონდი

საქართველოს სამოქალაქო საზოგადოების განვითარების ასოციაცია (ACSDG)

სამოქალაქო იდეა

ეკო ცენტრი

სამოქალაქო ჩართულობისა და აქტივიზმის ცენტრი (CEAC)

პრევენცია პროგრესისთვის (PFP)

ხანდაზმულ ქალთა ასოციაცია „ღირსეული სიბერე“

შშმ ქალთა ალიანსი

საქართველოს დემოკრატიული ინიციატივა (GDI)

მედიაომბუდსმენი

ქალი და განვითარება