„ქართული ოცნება“ კვლავ აპირებს რუსული კანონის მიღებას, რომელიც საქართველოში თავისუფალ და კრიტიკულ მოსაზრებებს დაასამარებს. კანონპროექტის მიღება საქართველოს მოსახლეობას ევროკავშირისკენ მიმავალ გზას დაუკეტავს.

დემოკრატიის კვლევის ინსტიტუტი ეხმიანება 13 მაისს პარლამენტის მიმდებარე ტერიტორიაზე სპეციალური დანიშნულების რაზმის თანამშრომლების მიერ აქციის მონაწილეების მიმართ ფიზიკური ანგარიშსწორების ფაქტებს, რაც ვერ ჩაითვლება კანონიერ საპოლიციო ღონისძიებებად.

13 მაისის,  დაახლოებით დილის 6 საათზე, შინაგან საქმეთა სამინისტრომ განცხადება გაავრცელა და  დემონსტრანტებს მოუწოდა, გაეთავისუფლებინათ პარლამენტის შენობის შესასვლელები, წინააღმდეგ შემთხვევაში, შსს-ს განცხადებით, გამოყენებული იქნებოდა „საპოლიციო ძალები“.

დემოკრატიის კვლევის ინსტიტუტის დაკვირვებით, პარლამენტის მიმდებარედ მიმდინარე აქციას არც ერთ ეტაპზე არ მიუღია ძალადობრივი ხასიათი. ასევე, აქციის მონაწილეების მხრიდან დეკლარირებული არ ყოფილა საკანონმდებლო ორგანოს შესასვლელების ბლოკირების განზრახვა. მიუხედავად აქციის ხაზგასმით მშვიდობიანი ხასიათისა, შსს-ს განცხადებიდან რამდენიმე წუთში, სამართალდამცავებმა ჟვანიას ქუჩის მიმდებარე მხარე ფიზიკური ძალის გამოყენებით იძულებით გაათავისუფლეს, რის შემდეგაც საკანონმდებლო ორგანოს მიმდებარედ დააკავეს აქციის 20 მონაწილე. გავრცელებული ვიდეომასალიდან ჩანს, რომ დაკავების მომენტში სამართალდამცავები დემონსტრანტებს ფიზიკურად უსწორდებიან და თავის არეში ანგარიშსწორების მიზნით ურტყამენ.

დემოკრატიის კვლევის ინსტიტუტის შეფასებით, პოლიციის მხრიდან დემონსტრანტთა დაკავების ფორმა არაკანონიერი და არაპროპორციული იყო - ათეულობით სამართალდამცავი, რომელთა უმრავლესობა ჩაცმულობის და აღჭურვილობის მიხედვით, არ წარმოადგენდა საპატრულო პოლიციის თანამშრომელს, წინასწარ მიზანში ამოღებულ აქციის მონაწილეს ფიზიკურად უსწორდებოდა და პოლიციის კორდონში მიათრევდა. საზოგადოებრივი ორგანიზაციების ადვოკატების მიერ მონახულებულ დაკავებულთა უმრავლესობას აღენიშნება სერიოზული ფიზიკური დაზიანების ნიშნები.

საპროტესტო აქციის და მშვიდობიან მომიტინგეებთან ანგარიშსწორების პარალელურად, საკანონმდებლო ორგანოში იურიდიულ საკითხთა კომიტეტმა რუსული კანონი მესამე მოსმენით 67 წამში განიხილა და მხარი დაუჭირა.

პოლიციის უკანონო ძალადობრივი ტაქტიკების სანქცირება და დაუსჯელობა, ზრდის უკანონო ძალადობის მასშტაბებს და მიზნად ისახავს პროტესტის მუხტის ჩახშობას. შესაბამისად, დემოკრატიის კვლევის ინსტიტუტი კიდევ ერთხელ მოუწოდებს: