11 ივლისს, დემოკრატიის კვლევის ინსტიტუტმა გამართა დისკუსია „ცხოვრება ენგურს მიღმა - ადამიანის უფლებების დაცვის მდგომარეობა გალში“. დისკუსიაზე განიხილეს გალში მაცხოვრებელთა უფლებრივი მდგომარეობა: ადამიანური უსაფრთხოება, გადაადგილებისა და განათლების უფლება, დევნილ ქალებთან დაკავშირებული პრობლემები.

ოკუპირებულ რეგიონების მოსახლეობის მძიმე სოციალურ და ეკონომიკურ პრობლემებს დე ფაქტო სტრუქტურების მიერ ხელოვნურად შექმნილი დაბრკოლებები ემატება. პრობლემა განსაკუთრებით მწვავედ დგას გალის რაიონში, სადაც მოსახლეობის უმრავლესობას ეთნიკური ქართველები შეადგენენ - ადამიანები, რომლებმაც კონფლიქტის მიუხედავად საკუთარი სახლები არ დატოვეს. მათ ხშირ შემთხვევაში ეზღუდებათ გადაადგილების თავისუფლება, უწევთ მძიმე სოციალურ-ეკონომიკური ყოფაში ცხოვრება, წართმეული აქვთ მშობლიურ ენაზე განათლების მიღების უფლება და რაც ყველაზე მნიშვნელოვანია, აქვთ უსაფრთხოებასთან და თვითგადარჩენასთან დაკავშირებული პრობლემები. დე ფაქტო სტრუქტურების მხრიდან გალის მოსახლეობისთვის შექმნილი დაბრკოლებები ართულებს კონფლიქტის შედეგად ისედაც მოწყვლადი მოსახლეობის ყოველდღიურ არსებობას, რაც დისკრიმინაციულ მოპყრობად უნდა შეფასდეს.

გალის მოსახლეობის საოკუპაციო ხაზს მიღმა ცხოვრებას კიდევ უფრო ამძიმებს საქართველოს მთავრობის უყურადღებობა და ნაკლები მგრძნობელობა.