სიტყვის თავისუფლება და მედიის უფლებები, წლებია მნიშვნელოვან პრობლემას წარმოადგენს სამხრეთ ოსეთის დე ფაქტო რესპუბლიკაში. არსებულ გარემოში დამკვიდრებულ პრაქტიკად იქცა სიტყვის თავისუფლების გამო სამოქალაქო აქტივისტებს დევნა და მედიის წარმომადგენლების შევიწროება. 

სამხრეთ ოსეთის დე ფაქტო ხელისუფლების მხრიდან დამოუკიდებელ მედიაზე ზეწოლის კიდევ ერთი ფაქტი გახდა ცნობილი. არსებული ინფორმაცია ონლაინგამოცემა "საპა ცხინვალის" რედაქტორის, ალინა ჯიგკაევას საჯარო ტელეგრამ სტატუსიდან გახდა ცნობილი. ცენზურისა და ზეწოლის სამიზნე „საპა ცხინვალი“  მას შემდეგ გახდა, რაც მათ  ალან გაგლოევის ჯანმრთელობის მდგომარეობის შესახებ ინფორმაცია გაავრცელეს.

ჯიგკაევას განცხადებით, ცხინვალში საქმიანობის დაწყებამდე, დე ფაქტო პრეზიდენტ ალან გაგლოევთან მეგობრული შეხვედრის ფარგლებში, რედაქტორმა გააცნო გამოცემის სარედაქციო პოლიტიკის მთავარი მიმართულებები, რაც სოციალური საკითხების გაშუქებას და პოლიტიკურად მგრძნობიარე თემებისგან თავის შეკავებას გულისხმობდა. საინფორმაციო საქმიანობის დაწყების შემდეგ, დე ფაქტო მთავრობამ გამოცემისთვის შეზღუდვების დაწესება დაიწყო და აკრედიტაციის პირობად, მისი საინფორმაციო პოლიტიკის სრული კონტროლი დააყენა. დე ფაქტო ხელისუფლება ასევე უკმაყოფილებას გამოხატავდა რედაქციის მიმართ და მოითხოვდა გარკვეული ჟურნალისტების გათავისუფლებას. გამოცემის მხრიდან, შეზღუდვების დაუმორჩილებლობის გამო, დე ფაქტო მთავრობამ გამოცემას აკრედიტაციაზე უარი განაცხადა. შედეგად, დე ფაქტო ხელისუფლების საჯარო მოხელეებს, რომლებიც „საპა ცხინვალთან“ ურთიერთობდნენ, დაბრკოლებები შეექმნათ. აკრედიტაციის არარსებობამ გამოცემასთან ყველა ოფიციალური კომუნიკაციის შეწყვეტა გამოიწვია. 

არსებული გარემოებებიდან გამომდინარე, გამოცემამ ცხინვალის ოფისის დახურვის გადაწყვეტილება მიიღო. ჯიგკაევა აცხადებს, რომ სარედაქციო კოლეგია გააგრძელებს ინფორმაციის მიუკერძოებელ და დამოუკიდებელ ონლაინ გაშუქებას, მათ შორის პოლიტიკურად და სოციალურ მგრძნობიარე თემებზე.