GEO   ENG
სიახლეები
DRI: ოკუპირებული ტერიტორიების მიმდებარე სოფლებში მედიის დაშვების შეზღუდვა გაუმართლებელია
05.03.2020
„დემოკრატიის კვლევის ინსტიტუტი“ ეხმაურება უკანასკნელ პერიოდში საოკუპაციო გამყოფ ხაზთან ახლოს მდებარე კასპის, გორის, ქარელის და ხაშურის მუნიციპალიტეტების სოფლებში საქართველოს ცენტრალური ხელისუფლების მხრიდან მედიის დაშვების შეზღუდვის შემთხვევებს.

2020 წლის 4 მარტს საოკუპაციო გამყოფ ხაზთან გამკაცრებული კონტროლის გამო, მედიის წარმომადგენლები არ შეუშვეს სოფელ ჩორჩანას საგუშაგოს ახლოს მდებარე ტყეში.[1] 2020 წლის 6 თებერვალს ერთადერთი სოფელი, რომელიც გამყოფ ხაზთან მდებარეობს და ჟურნალისტებისთვის ღია იყო, დაიკეტა. პოლიციის პოსტი მეღვრეკისის გადასახვევთან განთავსდა, საიდანაც არა თუ ერგნეთში, არამედ სოფელ მეღვრეკისში შესვლაც აიკრძალა.[2] საოკუპაციო გამყოფ ხაზთან, სოფელ ქერეში, 27 იანვარს პოლიციამ ჟურნალისტები არ შეუშვა.[3]

მაშინ, როდესაც საკითხი წარმოადგენს ქვეყნის უმნიშვნელოვანეს პრობლემას, სისტემატური ხასიათი აქვს ადამიანების პირადი თავისუფლების ხელყოფის, თავისუფლად გადაადგილებისა და საკუთრების უფლების, ასევე სოციალური და კულტურული უფლებების უხეშ დარღვევას და მკვეთრად გაუარესებულია ჰუმანიტარული გარემო - მედიის დისტანცირება პროცესებიდან დაუშვებელია.

პრაქტიკა, რომელიც დამკვიდრდა და გულისხმობს, შინაგან საქმეთა სამინისტროს წარმომადგენლების მიერ ჟურნალისტების საოკუპაციო ძალების მხრიდან უკვე გავლებულახალ ბოძებთან და ღობეებთან „მიყვანას“, საზოგადოებისთვის არსებული ვითარების მხოლოდ მცირე ფრაგმენტის ჩვენებას ხდის შესაძლებელს და აზიანებს საზოგადოებრივ ინტერესს - იყოს სრულად ინფორმირებული ქვეყანაში არსებული მდგომარეობის შესახებ. შესაბამისად, ამგვარი პრაქტიკა შეიძლება შეფასდეს, როგორც კონტრპროდუქტიული.
სახელმწიფო უწყებები უნდა აცნობიერებდნენ, რომ საოკუპაციო ხაზთან მიმდინარე პროცესების სრულფასოვანი გაშუქება, აუცილებელია კონფლიქტის რეალური სახის წარმოჩენისთვის და ასევე ეხმარება სახელმწიფოს არსებული ვითარების შესახებ საერთაშორისო თანამეგობრობის მრავალმხრივი ინფორმირების უზრუნველყოფის პროცესში.

„დემოკრატიის კვლევის ინსტიტუტის“ შეფასებით კონფლიქტურ ზონაში მცხოვრები მოსახლეობის განსაკუთრებული საჭიროებებიდან გამომდინარე, მედიისთვის წვდომის გამარტივება ხელს უწყობს საზოგადოებრივი სოლიდარობის ზრდას, ამცირებს დაუცველობის განცდას, დადებითად აისახება საერთაშორისო და ეროვნულ საინფორმაციო სივრცეში სახელმწიფოს პოზიციონირებაზე და უზრუნველყოფს ინფორმაციის თავისუფალი მიღებისა და გავრცელების უფლების რეალიზებას.

შესაბამისად, „დემოკრატიის კვლევის ინსტიტუტი“ მოუწოდებს საქართველოს შინაგან საქმეთა სამინისტროს, შეიმუშაოს მექანიზმი, რომელიც მცოცავი ოკუპაციის გაშუქებისას, ერთის მხრივ, უზრუნველყოფს ჟურნალისტების უსაფრთხოებას და მეორე მხრივ, მისცემს მათ პროფესიული საქმიანობის თავისუფლად განხორციელების შესაძლებლობას.

-----------------------------------------------
[1] „საოკუპაციო ხაზთან გამკაცრებული კონტროლი“ ტვ პირველი http://bit.do/fygJo
[2] „პოლიციამ ჟურნალისტების წინააღმდეგ პოსტი მეღვრეკისამდე გადასწია“, შიდა ქართლის საინფორმაციო ცენტრი, 06.02.2020 http://bit.do/fx5zt
[3] „ჩაკეტილი კონფლიქტის ზონა“, გოგა აფციაური, რადიო თავისუფლება 27.01.2020 http://bit.do/fx5uM
,,რუსული კანონის“ დასაცავად ხელისუფლება მშვიდობიანი აქციის მონაწილეების წინააღმდეგ ძალადობას აგრძელებს
12 ქართული არასამთავრობო ორგანიზაცია ვაგრძელებთ აპრილი-მაისის პერიოდში "რუსული კანონის" წინააღმდეგ მიმდინარე საპროტესტო აქციების დროს დაკავებული და დაზარალებული პირების უფლებების დაცვას.
16.05.2024
რუსული კანონი უპირობოდ უნდა იქნას გაწვეული
14 მაისს საქართველოს პარლამენტის უმრავლესობის წევრებმა ქართველი ხალხის ეროვნული ინტერესებისა და კონსტიტუციის საწინააღმდეგო რუსული კანონი მესამე მოსმენით მიიღეს.
16.05.2024
DRI: აქციის მონაწილეების მიმართ გამოყენებული ფიზიკური ანგარიშსწორება ვერ ჩაითვლება კანონიერ საპოლიციო ღონისძიებად

DRI ეხმიანება 13 მაისს პარლამენტის მიმდებარე ტერიტორიაზე სპეციალური დანიშნულების რაზმის თანამშრომლების მიერ აქციის მონაწილეების მიმართ ფიზიკური ანგარიშსწორების ფაქტებს, რაც ვერ ჩაითვლება კანონიერ საპოლიციო ღონისძიებებად.

13.05.2024