დემოკრატიის კვლევის ინსტიტუტმა 2023 წლის აგვისტო-ოქტომბრის ჩათვლით, სოციალურ ქსელებსა და ონლაინ მედიაში, ულტრამემარჯვენე ჯგუფების მიერ გავრცელებული პროპაგანდისტული, დეზინფორმაციული შინაარსის 465 შემთხვევა გაანალიზა.  საანგარიშო პერიოდში, „ქართული ოცნებისა“ და ღიად პრორუსული ულტრამემარჯვენე პოლიტიკური დაჯგუფების „კონსერვატიული მოძრაობა/ალტ-ინფოს“ ლიდერების რიტორიკა ცალკეულ საკითხებთან დაკავშირებით, იდენტური იყო. დაკვირვება ცხადყოფს, რომ ხელისუფლება რიგ შემთხვევებში პოლიტიკურ ინსტრუმენტად იყენებს ძალადობრივ ჯგუფებს.

„ქართული ოცნებისა“ და ულტრამემარჯვენე ჯგუფების ორკესტრირებული რიტორიკა განსაკუთრებით გააქტიურდა ოქტომბერში, სახელმწიფო უსაფრთხოების სამსახურის განცხადების ფონზე, რომლის თანახმადაც, USAID-ის მხარდაჭერილ ღონისძიებაზე „ხელისუფლების ძალადობრივი გზით დამხობის პროცესების“ მოსამზადებელი სამუშაოები მიმდინარეობდა. შესაძლო დესტაბილიზაციასა და სამოქალაქო არეულობის დაგეგმვაზე სახელმწიფო უსაფრთხოების სამსახურის განაცხადი „კონსერვატიული მოძრაობა/ალტ-ინფოს“ მიერ მხარდამჭერთა მობილიზებისა და ძალადობრივი ორგანიზაციული ერთობის „ანტი-მაიდნის“ შექმნის საფუძველი გახდა. მიუხედავად იმისა, რომ ორგანიზატორთა მოწოდებები შესაძლო დანაშაულის ნიშნებს შეიცავდა, სამართალდამცავი ორგანოების მხრიდან აღნიშნულ ფაქტს სათანადო რეაგირება არ მოჰყოლია. ერთი მხრივ, ხელისუფლების უმოქმედობა ძალადობრივი მოძრაობის შექმნასთან დაკავშირებით, და მეორე მხრივ, სახელმწიფო უსაფრთხოების სამსახურის აქცენტირება დასავლური ძალების მიერ ქვეყანაში დესტაბილიზაციის მოწყობის მცდელობაზე, ქმნის შთაბეჭდილებას, რომ შესაძლოა ხელისუფლების ინტერესში იყოს  ძალადობრივი ჯგუფების პოლიტიკურ ინსტრუმენტად გამოყენება.

მმართველი პარტიის მაღალი პოლიტიკური თანამდებობის პირები ულტრამემარჯვენე ჯგუფებთან ერთად ცდილობდნენ რუსული აგენტურის პირდაპირი გავლენების გადაფარვას ქართულ პოლიტიკაში. 2023 წლის 14 სექტემბერს, საქართველოს ყოფილი გენერალური პროკურორის ოთარ ფარცხალაძისთვის აშშ-ის სახელმწიფო დეპარტამენტის მიერ სანქციების დაწესებას მკვეთრად უარყოფითი შეფასებები მოჰყვა როგორც ხელისუფლების, ასევე, „ქართული ოცნების“ სატელიტი პოლიტიკური გაერთიანების „ხალხის ძალისა“ და ულტრამემარჯვენე ჯგუფების მხრიდან.

საანგარიშო პერიოდში, ულტრამემარჯვენე დაჯგუფებების დისკურსში ორი ძირითადი მიმართულება გამოიკვეთა, რომელთა გარშემოც ინტერაქცია ყველაზე მაღალი იყო: