საქართველოში მიმდინარე საპარლამენტო არჩევნები ოკუპირებულ აფხაზეთშიც განიხილეს. სახელისუფლებო პარტია „ქართული ოცნება“ 53.93%-ით ლიდერობა აფხაზეთის დე-ფაქტო ხელისუფლებისთვის მისაღები და დამაიმედებელი აღმოჩნდა. აფხაზმა პოლიტიკოსმა, ყოფილმა დე ფაქტო ვიცე-პრემიერმა ადგურ არძინბამ ტელეგრამ არხზე და თავის პირად ფეისბუქ გვერდზე განათავსა სტატია, სადაც საქართველოს საგარეო კურსის ცვლილებაზე დაწერა. ადგურ არძინბამ ისტორიულ მოვლენებთან „პარალელები“ გაავლო და განაცხადა: „დღეს დასავლეთი დასუსტდა რეგიონში და რუსეთი, პირიქით, ნელ-ნელა, მაგრამ აუცილებლად იბრუნებს თავის წამყვან როლს. ხოლო „ქართული ოცნება” საქართველოში სცენაზე ახალი ელფერით გამოდის.”

არჩევნების შედეგები განხილვის თემა იყო აფხაზურ მედიაშიც. აფხაზი ჟურნალისტის იზიდა ჭანიას შეფასებით, „ზოგიერთი ფრაზიდან და ხელმძღვანელობის ქცევიდან შეიძლება მიხვდეთ, რომ აფხაზეთის ხელისუფლება „ქართული ოცნების“ მხარდამჭერია. 23 ოქტომბერს საქართველოსთან სახელმწიფო საზღვრის დახურვა მათი პოლიტიკური სიმპათიების გამოხატულება იყო თუ ეს ქართული ოპოზიციის მტრის სახის შენარჩუნებას ემსახურებოდა, რთული სათქმელია. . .“ ბლოგის ნაწილში - „რას უნდა ელოდოს აფხაზეთი საქართველოს არჩევნებისგან?“, ჭანიას შეფასებით, საქართველოს არ უნდა გააჩნდეს მოლოდინი, რომ რუსეთი აფხაზეთს ახალი ეკონომიკური შესაძლებლობების სანაცვლოდ დათმობს. მისი შეფასებით, მოსკოვი მზადაა დაეხმაროს საქართველოს, აფხაზეთს და სამხრეთ ოსეთს ურთიერთობების ნორმალიზების პროცესში, თუკი თავად „ქვეყნები“ დაინტერესდებიან ამით.

ამ შეფასებებისა და განწყობების ფონზე, შესაძლოა, ენგურის ხიდის ერთი კვირით დაკეტვა, მხოლოდ აფხაზური მხარის ინიციატივა არ ყოფილიყო. DRC საკონტაქტო პირების ინფორმაციით, მთელი კვირის განმავლობაში არაერთი გალელი ცდილობდა ზუგდიდში არჩევნებში მონაწილეობის მისაღებად გადასვლას, თუმცა, უშედეგოდ.  საქართველოს ხელისუფლებას გალის რაიონში მაცხოვრებელი 30,000 ადამიანისთვის საარჩევნო უფლების წართმევაზე ოფიციალური განცხადება არ გაუკეთებია.

საქართველოში არჩევნები ეუთოს დემოკრატიული ინსტიტუტებისა და ადამიანის უფლებათა ოფისის მიერ ორგანიზებული სადამკვირვებლო მისიის წინასწარი შეფასებით, არადემოკრატიულად წარიმართა, სადაც კენჭისყრის დღეს „ადგილი ჰქონდა ზეწოლას, რომელიც ეჭვს ბადებს ქვეყანაში თავისუფლად ხმის მიცემის შესაძლებლობაზე.“ ქართული სადამკვირვებლო მისიების განცხადებით კი, ცენტრალური საარჩევნო კომისიის მიერ გამოქვეყნებული წინასწარი შედეგები არ ასახავდა საქართველოს მოქალაქეების ნებას.