ოკუპირებულ რეგიონებში მცხოვრები მოქალაქეები მუდმივად დგანან გადაადგილების თავისუფლების, უსაფრთხოების და ფინანსური ხასიათის პრობლემების წინაშე. ბოლო პერიოდში ახალგორში განვითარებული მოვლენები ცხადყოფს, რომ საოკუპაციო ძალების ზეწოლა ადგილობრივ მოსახლეობაზე იზრდება.

მიმდინარე წლის 2 დეკემბრიდან ახალგორის მოსახლეობის მიმართ შემოღებული ე.წ. „შემარბილებელი“ დაშვებებით ჰუმანიტარული კრიზისი არ ამოწურულა. ახალგორში მცხოვრები ადამიანები კვლავ დგანან მნიშვნელოვანი გამოწვევებისა და პრობლემების წინაშე. კერძოდ, საოკუპაციო ძალების მიერ შემოთავაზებული ზომების მიხედვით:

• საქართველოს კონტროლირებად ტერიტორიაზე გადმოსვლის უფლებას მძიმე პაციენტებს მხოლოდ ახალგორიდან ცხინვალში ჩასვლის შემდეგმისცემენ, რაც სამედიცინო საჭიროების მქონე პირთა სიცოცხლისა და ჯანმრთელობისთვის საფრთხეს წარმოადგენს.
• არაოფიციალური ინფორმაციით, საოკუპაციო ხაზის გადაკვეთის უფლება ექნებათ მხოლოდ იმ პენსიონერებს, რომლებიც მარტო ქართულ პენსიას იღებენ.საზოგადოების დანარჩენ ნაწილს კი, რომელიც ამ კატეგორიას არ ეკუთვნის, სრულად ექნება შეზღუდული თავისუფალი გადაადგილების უფლება.

ახალგორის მიმართ საოკუპაციო ძალების დაწესებული ე.წ. „შემარბილებელი“ დაშვებები უნდა შეფასდეს როგორც პრობლემის მოგვარებისკენ გადადგმული უმცირესი ნაბიჯი, რომელზეც მსჯელობა უნდა გაგრძელდეს საერთაშორისო დონეზე, რათა ახალი პრაქტიკა მისაღებ ნორმად არ დამკვიდრდეს. წინააღმდეგ შემთხვევაში, არსებობს ახალგორის მოსახლეობისგან სრულად დაცლის რეალური საშიშროება.

არსებული გამოწვევების გათვალისწინებით, „დემოკრატიის კვლევის ინსტიტუტი“ (DRI) მიიჩნევს, რომ აუცილებელია ოკუპირებულ რეგიონებში მცხოვრები ადამიანების მხარდაჭერისთვის დამატებითი მექანიზმების შემუშავება.

• აუცილებელია ოკუპირებული რეგიონების მიმართ ხელისუფლების ქმედებები გახდეს პროაქტიული. ახალგორის გარშემო განვითარებული მოვლენები ცხადყოფს, რომ ხელისუფლებას არ გააჩნია მსგავსი კრიზისების დროს კონკრეტული სამოქმედო გეგმა, როგორიც არის მაგალითად, ჰუმანიტარული მიმართულებით მომუშავე ადამიანთა სიის შექმნა, ასევე, საკვებისა და მედიკამენტების დროული შეტანა მოსახლეობისთვის, რომლის განხორციელების რამდენიმე მიმართულება უნდა არსებოდეს;
• ოკუპირებულ რეგიონებში მცხოვრები ადამიანები, საქართველოს კონტროლირებად ტერიტორიებზე მცხოვრები მოსახლეობისგან განსხვავებული გამოწვევების წინაშე დგანან, შესაბამისად, მათთვის განსაკუთრებული მხარდამჭერი მექანიზმებია შესამუშავებელი. კონკრეტულად კი, არსებულ საგანმანათლებლო და ჯანდაცვის პროგრამებთან ერთად, აუცილებელია სპეციალური ფინანსური დახმარების სახელმწიფო პროგრამაც შეიქმნას.

 „დემოკრატიის კვლევის ინსტიტუტი“ მოუწოდებს ხელისუფლებას, არ დაუშვას ე.წ. „შემარბილებელი“ რეჟიმის „მიღებულ ნორმად“ დამკვიდრება და მოითხოვოს ახალგორის მოსახლეობისთვის შეუზღუდავი გადაადგილების უზრუნველყოფა.