GEO   ENG
სიახლეები
DRI: გენერალურ პროკურორად ირაკლი შოთაძის შერჩევა იქნება უარი დამოუკიდებელი, გამჭვირვალე და დეპოლიტიზირებული პროკურატურის იდეაზე
17.01.2020

„დემოკრატიის კვლევის ინსტიტუტი“ ეხმაურება ტექნიკური უნივერსიტეტის მიერ საპროკურორო საბჭოსათვის ირაკლი შოთაძის კანდიდატურის წარდგენას და მიაჩნია, რომ გენერალური პროკურორის კანდიდატად ირაკლი შოთაძის შერჩევა იქნება ხელისუფლების უარი დამოუკიდებელი, გამჭვირვალე და დეპოლიტიზირებული პროკურატურის შექმნაზე.

ირაკლი შოთაძე მთავარი პროკურორის თანამდებობაზე საქართველოს პარლამენტმა 2015 წელს აირჩია. შოთაძემ თანამდებობა 2018 წლის 31 მაისს დატოვა ხორავას ქუჩაზე მოკლული არასრულწლოვნების საქმესთან დაკავშირებული საპროტესტო აქციების ფონზე.

ირაკლი შოთაძის მთავარი პროკურორობის პერიოდში დღის წესრიგიდან არ მოხსნილა ის საკითხები, რაც პროკურატურის სავარაუდო პოლიტიზაციას და მისი როგორც დამოუკიდებელი და მიუკერძოებელი სახელმწიფო ინსტიტუტის არსებობას  უკავშირდებოდა. უფრო მეტიც, მისი მთავარი პროკურორობის პერიოდს უკავშირდება საზოგადოებისათვის მნიშვნელოვანი სისხლის სამართლის საქმეების გამოძიებების გაჭიანურება[1], არასწორი მიმართულებით წარმართვა და კონკრეტულ სისხლის სამართლის საქმეებზე მაღალჩინოსან პირთა შესაძლო მფარველობა. გარდა ამისა, დღევანდელ დღემდე პასუხგაუცემელია კითხვები დავით სარალიძის მკვლელობის გამოძიების საქმეში პროკურატურის მაღალი თანამდებობის პირთა, მათ შორის, თავად ირაკლი შოთაძის როლთან დაკავშირებით.

იმის გათვალისწინებით, რომ ხელისუფლების მხრიდან დამაჯერებელი პასუხები არ გაცემულა ირაკლი შოთაძის მონაწილეობას პოლიტიკურ და ბიზნეს სუბიექტებს შორის არაფორმალურ მოლაპარაკებებში,[2]  „დემოკრატიის კვლევის ინსტიტუტის“ გუნდს მიაჩნია, რომ შოთაძე მთავარი პროკურორის რანგში ვერ უზრუნველყოფს პროკურატურის საქმიანობაში კანონმდებლობით გათვალისწინებული მიუკერძოვებლობის, ობიექტურობის და პოლიტიკურ ნეიტრალიტეტის პრინციპების დაცვას.

აღნიშნული გარემოებებიდან გამომდინარე, „დემოკრატიის კვლევის ინსტიტუტი“ მოუწოდებს საპროკურორო საბჭოს, უარი თქვას გენერალური პროკურორობის კანდიდატად ირაკლი შოთაძის შერჩევაზე.

[1] მაგალითად, აზერბაიჯანელი ჟურნალისტის აფგან მუხთარლის თბილისის ცენტრში მოტაცების და თემირლან მაჩალიკაშვილის მკვლელობის საქმეები.

[2]https://netgazeti.ge/news/391618/?fbclid=IwAR1gpVZJYGdcXMArlYRBjRM9GRGqKzJEMpMw79d_Aa6XCSyWZgAzyKxeFh4

სახელმწიფო უსაფრთხოების სამსახურის ყოველწლიური ანგარიში თავს არიდებს რუსეთის საფრთხედ მოხსენიებას

დღეს პარლამენტი სახელმწიფო უსაფრთხოების სამსახურის ყოველწლიურ ანგარიშს სამი კომიტეტის გაერთიანებულ სხდომაზე მოისმენს. 

12.06.2024
DRI: ძალადობრივი ჯგუფების დანაშაულებრივ ქმედებებზე პასუხისმგებლობა ხელისუფლებას ეკისრება
შალვა პაპუაშვილის განცხადებიდან ერთ საათში, ზუკა ბერძენიშვილს თავს დაესხნენ და ფიზიკურად გაუსწორდნენ.
11.06.2024
როგორ ჩატარდა არალეგიტიმური ხმის მიცემის პროცესი სამხრეთ ოსეთი/ცხინვალის რეგიონში?

2024 წლის 9 ივნისს ოკუპირებული სამხრეთ ოსეთი/ცხინვალის რეგიონში დე ფაქტო საპარლამენტო არჩევნები ჩატარდა

11.06.2024