ძალადობრივი პოლიტიკური დაჯგუფება „კონსერვატიული მოძრაობა/ალტ-ინფოს“ ლიდერებმა დაფუძნების დღესვე, 2021 წლის 20 ნოემბერს ღიად განაცხადეს, რომ მათი მიზანი  საქართველოს პროდასავლური საგარეო ვექტორის პრორუსულით შეცვლა და საჭიროების შემთხვევაში, საქართველოს ტერიტორიაზე რუსული სამხედრო ბაზების განთავსებაა. დაჯგუფების წარმომადგენელთა რადიკალური ხედვები დეკლარირებულია წესდებითაც, სადაც „კონსერვატიული მოძრაობის“ მიზნებად განსაზღვრულია  მედიისა და განათლების სფეროში „გარე ჩარევის აკრძალვა“ და საზღვარგარეთიდან დაფინანსებული ორგანიზაციების მაქსიმალური კონტროლი საკანონმდებლო დონეზე.

„კონსერვატიული მოძრაობის“ ლიდერებმა ღიად განაცხადეს, რომ მიზნად ისახავენ 2024 წლის საპარლამენტო არჩევნებში მონაწილეობის მიღებას. მათ ერთობლივ გამოსვლაში აღნიშნულია, რომ „კონსერვატიული მოძრაობის“ გარეშე ვეღარ მოხდება ქვეყნისთვის აქტიური პოლიტიკური თემების განსაზღვრა და „2024 წლისთვის „კონსერვატიული მოძრაობა“ იქნება ის ძალა, რომელიც გადაჭრის უამრავ ამოცანას ქვეყნისთვის“. ძალადობრივი დაჯგუფების ღიად პროკრემლისტური მიზნების და რადიკალური ხედვებიდან გამომდინარე, 2024 წლის საპარლამენტო არჩევნების წინ, დემოკრატიის კვლევის ინსტიტუტი მნიშვნელოვნად მიიჩნევს განაგრძოს დაკვირვება „კონსერვატიული მოძრაობა/ალტ-ინფოს“ დაფინანსების წყაროების, პოლიტიკური ტრანსფორმაციებისა და  სამოქმედო დღის წესრიგის შესასწავლად.

2023 წლის იანვრიდან 2023 წლის მარტის ჩათვლით, „კონსერვატიულ მოძრაობას/ალტ-ინფოს“ სხვა ოპოზიციურ და მმართველ პარტიასთან შედარებით ყველაზე მეტი, 27 შემომწირველი ჰყავს.

„კონსერვატიული მოძრაობა/ალტ-ინფო“	27 შემომწირველი
„ევროპული საქართველო“	17 შემომწირველი
„ლელო საქართველოსთვის“	12 შემომწირველი
„ქართული ოცნება“	8 შემომწირველი
ნაციონალური მოძრაობა	7 შემომწირველი

რაც შეეხება შემოწირული თანხის რაოდენობას, 2023 წლის იანვრიდან მარტის ჩათვლით, „კონსერვატიულმა მოძრაობამ/ალტ-ინფომ“ 24.684 ლარი მიიღო. შემოწირული თანხის რაოდენობით „კონსერვატიული მოძრაობა/ალტ-ინფო“ მეოთხე ადგილზეა.

ქართული ოცნება“	300.000 ლარი
„ლელო საქართველოსთვის“	222.000 ლარი
„ევროპული საქართველო“	78.197 ლარი
„კონსერვატიული მოძრაობა/ალტ-ინფო“	24.684 ლარი
„ნაციონალური მოძრაობა“	7,650 ლარი

დაფუძნების დღიდან, „კონსერვატიული მოძრაობისთვის“ ოფიციალურად შეწირულმა თანხამ 500.000 ლარს გადააჭარბა. საერთო ჯამში, პარტიამ 585-ჯერ მიიღო შემოწირულება 102 ფიზიკური პირისგან; 102 ფიზიკური შემომწირველიდან 25 დაჯგუფების რეგიონული ოფისის ხელმძღვანელია; შემომწირველების უმრავლესობის სახელზე საჯარო რეესტრში არაა რეგისტრირებული უძრავი ქონება.

აღსანიშნავია, რომ 2022 წლის განმავლობაში „კონსერვატიული მოძრაობის“ შემომწირველები თანხას ყოველი თვის შუა რიცხვებში სწირავდნენ. ამის შესახებ დემოკრატიის კვლევის ინსტიტუტიც წერდა. თუმცა 2023 წელს დინამიკა შეიცვალა. ახლა შემომწირველები პარტიას თანხას სხვადასხვა დღეებში სწირავენ.

დემოკრატიული კვლევის ინსტიტუტი წარსულშიც წერდა „კონსერვატიული მოძრაობის/ალტ-ინფოს“ მსხვილ შემომწირველებზე. ყველაზე მსხვილი შემომწირველი ამჟამად კახაბერ ელიზბარაშვილია. მის მიერ პარტიისთვის ჯამურად შეწირული თანხა 41.745 ლარია.  პარტიის ყველაზე მსხვილი შემომწირველებიდან ელიზბარაშვილი ერთადერთია, რომელიც უძრავ ქონებას ფლობს. ის შპს „დაბოს“ 50%-იანი წილის მფლობელიცაა. მეორე ადგილზე ზურაბ კობახიძეა. მის მიერ შეწირული თანხის ოდენობა 41.143 ლარია. მესამე ადგილს კი გოგა თუხარელი იკავებს.

2022 წლის განმავლობაში „კონსერვატიულმა პარტიამ/ალტ-ინფომ“ 64 ოფისი გახსნა საქართველოს სხვადასხვა რეგიონში. თუმცა, 2022 წლის აგვისტოში ცნობილი გახდა, რომ დაჯგუფებამ 10-მდე ოფისი დაკეტა.[1] როგორც „კონსერვატიული მოძრაობის/ალტ-ინფოს“ ლიდერი კონსტანტინე მორგოშია რადიო თავისუფლებასთან ინტერვიუში აცხადებდა, ოფისების დახურვის მიზეზი ფინანსური პრობლემებია.

[1] რადიო თავისუფლება, მარტი 10, 2022, "კონსერვატიული მოძრაობა" 10-მდე ოფისს ხურავს - აქვს თუ არა "ალტ-ინფოს" ფინანსური პრობლემა? ხელმისაწვდომია
https://www.radiotavisupleba.ge/a/31982341.html