GEO   ENG
სიახლეები
DRI: სასამართლო განაჩენით 5 ივლისის ძალადობის ორგანიზატორების არსებობა დასტურდება
19.05.2022
2021 წლის 5-6 ივლისის ძალადობრივ მოვლენებთან დაკავშირებით თბილისის საქალაქო სასამართლოს სისხლის სამართლის საქმეთა კოლეგიის მიერ ლექსო ლაშქარავას და მირანდა ბაღათურიას ეპიზოდში მიღებული გამამტყუნებელი განაჩენით კიდევ ერთხელ დასტურდება, რომ 5 ივლისის ძალადობრივი დარბევა ორგანიზებული იყო.  

თბილისის საქალაქო სასამართლოს მოსამართლე ნინო ელიეშვილმა, 5 ივლისის ძალადობრივი მოვლენების საქმის განმხილველი მოსამართლეებისგან განსხვავებით, ექვსივე მსჯავრდებული დამნაშავეებად სცნო ორგანიზებულ ჯგუფურ დანაშაულში მონაწილეობაში.[1]

2022 წლის 4 აპრილის განაჩენის სამართლებრივი შეფასების ნაწილში ხაზგასმულია, რომ „სწორედ „თბილისი პრაიდის” აქციის მონაწილეთა საწინააღმდეგოდ, სექსუალური ორიენტაციისა და გენდერული იდენტობის ნიშნით ორგანიზებულ იქნა ჯგუფური ძალადობა, [...] აქციის მონაწილეთა მხრიდან იყო ჰომოფობიური და ტრანსფობიური  მოწოდებები, მათი დევნის, ფიზიკური ანგარიშსწორების და ჟურნალისტთა პროფესიული საქმიანობის შეწყვეტის მიზნით, რაც ბრალდებულების და მათი სხვა თანამზრახველი პირების მიერ სისრულეში იქნა მოყვანილი”.[2]

სასამართლომ ყურადღება გაამახვილა „ონლაინ გამოცემა „პუბლიკას” მიერ გაკეთებულ სიუჟეტზე, რომელშიც ნათლად ჩანს 2021 წლის 5 ივლისამდე განვითარებული მოვლენები, სხვადასხვა პირთა მიერ გამოთქმული მოსაზრებები და მოქმედებები 5 ივლისს განსავითარებელ მოვლენებთან და დასაგეგმ ღონისძიებებთან დაკავშირებით, [...]. შემდგომი მოვლენები 5 ივლისს განვითარდა ისე, როგორც მანამდე იყო ახსნილი სიუჟეტში.[3]

გამამტყუნებელი განაჩენის მიხედვით, სასამართლო სხდომაზე გამოკვლეულ ვიდეო ჩანაწერში ნათლად ისმის და ეს ასახულია ასევე სიუჟეტშიც, რომ „სირცხვილიას” ოფისისკენ რამდენიმე ასეული ადამიანი უნდა წავიდეს, რადგან იქ შეკრებილი არიან „ლგბტ” თემის წარმომადგენლები და მათი დამცველები.

აღნიშნული ვიდეო სიუჟეტი ადასტურებს, რომ 5 ივლისის ძალადობრივი მოვლენების ორგანიზება რამდენიმე კვირით ადრე დაიწყო. ძალადობრივი, ჰომოფობიური, ულტრამემარჯვენე ორგანიზაციის „ალტ-ინფოს“ წევრები საკუთარი არხის ეთერით მაყურებელს დანაშაულის ჩადენისკენ მოუწოდებენ და ძალადობისკენ აქეზებდნენ. ვიდეოში ყურადღება გამახვილებულია „ალტ-ინფოს“ ლიდერ ზურა მახარაძის მოწოდებებზე, რომელიც ძალადობრივი მოვლენების ერთ-ერთი მთავარი ორგანიზატორია.

სასამართლომ, მიუხედავად იმისა, რომ დაზარალებულების და მოწმეების ჩვენებებისა და სხვა მტკიცებულებების საფუძველზე შესაძლებელი იყო სიუჟეტში ასახული პირების იდენტიფიცირება, მხოლოდ ორგანიზატორების არსებობის შესახებ მიუთითა. აღნიშნულ სიუჟეტში ზურაბ მახარაძესთან ერთად ორგანიზების პროცესში მონაწილეობას იღებენ შოთა მარტინენკო, კოკა მორგოშია, „ალტ-ანალიტიკის” წამყვანები, სასულიერო და სხვა პირებიც.

იმის გასარკვევად, მიმდინარეობს თუ არა გამოძიება 5-6 ივლისის ძალადობრივი  მოვლენების ორგანიზატორი პირების სისხლის სამართლის პასუხისგებაში მისაცემად, დემოკრატიის კვლევის ინსტიტუტმა საქართველოს გენერალურ პროკურატურას კითხვით მიმართა.[4] პროკურატურიდან მიღებულ პასუხში მითითებულია,[5] რომ 2021 წლის 5 ივლისს რუსთაველის გამზირზე და მიმდებარე ტერიტორიაზე განვითარებულ ძალადობრივ ფაქტებთან დაკავშირებით, საქართველოს პროკურატურაში გამოძიება საქართველოს სისხლის სამართლის კოდექსის ჯგუფური დანაშაულის ორგანიზების და მასში მონაწილეობის (225-ე მუხლი პირველი მე-2 ნაწილებით), ძალადობრივი ქმედებისკენ საჯაროდ მოწოდების (2391 მუხლის პირველი ნაწილი), დევნის და ჟურნალისტისათვის პროფესიულ საქმიანობაში უკანონოდ ხელის შეშლის (156-ე მუხლით და 154-ე მუხლით) საფუძვლებით მიმდინარეობს.

საგანგაშოა, რომ 5 ივლისის ძალადობრივი მოვლენებიდან  ათი თვის შემდეგაც კი, საქართველოს პროკურატურას არ დაუწყია ძალადობის ორგანიზატორ პირთა სისხლისსამართლებრივი დევნა,  მიუხედავად იმისა, რომ ორგანიზატორების ბრალეულობა სასამართლოს გამამტყუნებელი განაჩენითაც დასტურდება.
 
მოვუწოდებთ საქართველოს პროკურატურას, 5 ივლისის ძალადობრივი მოვლენების ორგანიზატორების სისხლისსამართლებრივი დევნა დაუყოვნებლივ დაიწყოს.

 
[1] დეტალურად იხილეთ DRI-ს 2022 წლის 6 აპრილის განცხადება, ხელმისაწვოდმია https://www.democracyresearch.org/geo/944/
[2] თბილისის საქალაქო სასამართლოს სისხლის სამართლის კოლეგიის 2022 წლის 4 აპრილის განაჩენი, გვ. 38
[3] თბილისის საქალაქო სასამართლოს სისხლის სამართლის კოლეგიის 2022 წლის 4 აპრილის განაჩენი, გვ. 39
[4] DRI-ს 2022 წლის 7 აპრილის წერილი N20220704-321
[5] საქართველოს გენერალური პროკურატურის 2022 წლის 16 მაისის წერილი N13/29616.
სახელმწიფო უსაფრთხოების სამსახურის ყოველწლიური ანგარიში თავს არიდებს რუსეთის საფრთხედ მოხსენიებას

დღეს პარლამენტი სახელმწიფო უსაფრთხოების სამსახურის ყოველწლიურ ანგარიშს სამი კომიტეტის გაერთიანებულ სხდომაზე მოისმენს. 

12.06.2024
DRI: ძალადობრივი ჯგუფების დანაშაულებრივ ქმედებებზე პასუხისმგებლობა ხელისუფლებას ეკისრება
შალვა პაპუაშვილის განცხადებიდან ერთ საათში, ზუკა ბერძენიშვილს თავს დაესხნენ და ფიზიკურად გაუსწორდნენ.
11.06.2024
როგორ ჩატარდა არალეგიტიმური ხმის მიცემის პროცესი სამხრეთ ოსეთი/ცხინვალის რეგიონში?

2024 წლის 9 ივნისს ოკუპირებული სამხრეთ ოსეთი/ცხინვალის რეგიონში დე ფაქტო საპარლამენტო არჩევნები ჩატარდა

11.06.2024