GEO   ENG
ანგარიშები
საოკუპაციო ხაზთან მცხოვრები მოსახლეობის პრობლემები
03.09.2021
ეკონომიკური სიდუხჭირე ე.წ. საოკუპაციო ხაზთან მდებარე სოფლებში მაცხოვრებელთა ძირითადი წუხილია. აქ ოჯახების ყოველთვიური შემოსავალი საუკეთესო შემთხვევაში 400 ლარს არ აღემატება, მინიმუმ კი, 45-100 ლარია. ამ ყველაფერს, ხშირ შემთხვევაში, ცენტრალური და ადგილობრივი ხელისუფლების უყურადღებობაც ემატება.

დემოკრატიის კვლევის ინსტიტუტის წარმომადგენლები კასპის მუნიციპალიტეტის საოკუპაციო ხაზთან მდებარე სოფელ საკორინთლოში და ქვემო ჭალაში, გორის მუნიციპალიტეტის სოფელ ჯარიაშენში და ქარელის მუნიციპალიტეტის საქაშეთის დევნილთა ჩასახლებაში იმყოფებოდნენ.

კასპის მუნიციპალიტეტის სოფლებში საკორინთლოსა და ქვემო ჭალაში ადგილობრივებისთვის მთავარი პრობლემა სარწყავი სისტემის არარსებობა, ფინანსური სიდუხჭირე და უსაფრთხოებასთან დაკავშირებული წუხილებია. ქვემო ჭალისგან განსხვავებით, სოფელ საკორინთლოს პრობლემებს  სკოლისა და საბავშვო ბაღის არ არსებობა ემატება. სოფლებს არ აქვთ ამბულატორია, აფთიაქი, სასურსათო მაღაზია და ტრანსპორტის მოსაცდელი.

გორის მუნიციპალიტეტის სოფელი ჯარიაშენი მიწის ნაკვეთების დიდი ნაწილი ოკუპირებულ ტერიტორიაზეა მოქცეული. მცირემიწიანობის პრობლემას მეზობელ სოფელთან სადაო საძოვარიც ემატება, რომელიც, როგორც ამბობენ, ჯარიაშენს ეკუთვნოდა, თუმცა, ცალკეული პირების ინტერესის გამო, სარგებლობას ვეღარ ახერხებენ.

ძირითად პრობლემებს დაუცველობის განცდაც ემატება. ჯარიაშენს ოკუპირებული ცხინვალის რეგიონისგან ტრაქტორით გავლებული ხნული ყოფს, ამიტომ მაცხოვრებლების აზრით, აქ პოლიციის საგუშაგოს არსებობა აუცილებელია. გარე განათება ახლახან გაკეთდა, თუმცა არასრულად. სოფლის ბოლოს მდებარე სახლამდე, რომელიც ოკუპანტების მიერ გავლებულ ხნულს ესაზღვრება, არც გზა მიდის და არც გარე განათების ბოძებია. სოფელში მოუწესრიგებელია გზები, ნაგვის ურნები ძირითადად დაზიანებულია. სოფელში ვიზიტორს შეიძლება გაუჩნდეს განცდა, რომ საქართველოს ცენტრალური ხელისუფლების მიერ კონტროლირებადი ტერიტორია ნებაყოფლობითაა მიტოვებული.

ვიზიტის ფარგლებში ყველაზე მძიმე მდგომარეობა  ქარელის მუნიციპალიტეტის დევნილთა ჩასახლება საქაშეთში დაგვხვდა. უამრავ პრობლემას შორის, დევნილები ყველაზე მეტად იმაზე წუხან, რომ მათთვის განაწილებული და სარგებლობაში მქონე სასოფლო-სამეურნეო მიწის ნაკვეთები, დაპირების მიუხედავად, საკუთრებაში ჯერ არ გადაუციათ.

საქაშეთის პრობლემების ჩამონათვალი ვრცელია. დასახლებას არ ემსახურება მუნიციპალური ტრანსპორტი, რაც ართულებს სამედიცინო სერვისებზე, მედიკამენტებზე, განათლებაზე და საგანმანათლებლო დაწესებულებებზე ხელმისაწვდომობას. გაუმართავია სანიაღვრე სისტემა, რის გამოც ერთსართულიანი სახლები მუდმივად დანესტილია. მოუწესრიგებელია შიდა გზებიც. ყველაზე მწვავე პრობლემა აქაც უმუშევრობაა. მაცხოვრებლების შემოსავლის ძირითადი წყარო სოფლის მეურნეობაა. ამიტომ მცირემიწიანობა მნიშვნელოვანი გამოწვევაა. დასახლების მაცხოვრებელთა ერთ-ერთი მთავარი მოთხოვნა სასოფლო-სამეურნეო მიწის ნაკვეთების და საძოვრების პრობლემის მოგვარებაა.

საოკუპაციო ხაზთან მცხოვრები მოსახლეობის პრობლემები (სოფლები საკორინთლო, ქვემო ჭალა, ჯარიაშენი, საქაშეთის დევნილთა ჩასახლება)

DRI: „კონსერვატიულო მოძრაობა/ალტ-ინფოს“ შემოსავალი, შესაძლოა, ბევრად მეტია, ვიდრე ოფიციალურ წყაროებში ჩანს

DRI აგრძელებს ულტრამემარჯვენე ძალადობრივი დაჯგუფების „კონსერვატიული მოძრაობა/ალტ-ინფოს“ ფინანსებსა და შემომწირველებზე დაკვირვებას. 2023 წლის აგვისტოში რადიკალურმა მოძრაობამ მხოლოდ ერთი შემოწირულება მიიღო.

25.09.2023
ცხინვალის შერჩევითი მობილობის პოლიტიკა კორუფციის და ახალგორელების დისკრიმინაციის წყაროა
საშვის მიღებასთან დაკავშირებული ხელოვნური დაბრკოლებები მოსახლეობას საშვის ასაღებად ქრთამის მიცემისკენ უბიძგებს. ეს კორუფციული მექანიზმი ადგილობრივი მუნიციპალური და უშიშროების სამსახურების ერთობლივი ეკონომიკური საქმიანობაა.
25.09.2023
სანქცირებული ფარცხალაძე - რუსული აგენტურის კვალი ქართულ პოლიტიკაში
14 სექტემბერს,  ოთარ ფარცხალაძისთვის  აშშ-ის მიერ სანქციების დაწესებას მკვეთრად უარყოფითი შეფასებები მოჰყვა ხელისუფლების სატელიტი პოლიტიკური გაერთიანების „ხალხის ძალისა“ და ულტრამემარჯვენე ჯგუფების მხრიდან. 
22.09.2023